Saioa Baleztena
Koronabirusaren ondorioz gizartean loratutako osasun krisiak gogorren kolpatu ditu ahulenak. GIZADIBERRiren ale honetako ‘Protagonista’ atalean hainbat egitasmoetako ordezkarien testigantza ekarri nahi izan dugu.
COVID-19ak eztanda egin zuenetik urtebete betetzen den honetan, txertaketa kanpainak aurrera jarraitzen duen arren, zerumuga argirik gabe jarraitzen dugunean, agerian gelditu da koronabirusak gogorren kolpatu dituela ahulenak. Baina, nola eragin du zehazki? Zein izan dira gehien kolpatu dituen sektoreak? Zeintzuk dira hemendik aurrerako erronka nagusiak?
Koronabirusak areagotutako osasun eta ekonomiaren krisiaren testuinguruan, Euskal Herrian giza eskubideen alde lanean diharduten hiru egitasmoren eskariak jaso ditugu hurrengo lerroetan.
Alzheimerra, lehentasun soziosanitarioa
Koldo Aulestia
Alzheimerrari heltzea osasun publikoaren lehentasuna eta lehen mailako arazo soziosanitarioa da. XXI. mendeko epidemia isil handia bihurtu da, eta edozein sistema soziosanitarioen iraunkortasunerako erronka handia.